عەلی ئیسماعیل
هەرێمی کوردستان ئەمڕۆ لەبەردەم مەترسیدارترین وەرچەرخانی مێژووییدایە. ئەو قەوارەیەی بە خوێنی هەزاران شەهید و ئەنفال و کیمیاباران بەدەستهات، ئێستا لە سایەی حوکمڕانییەکی گەندەڵ و نابەرپرسدا، بەرەو هەڵدێر دەبرێت. ئەوەی دوژمنان بە تۆپ و تەیارە پێیان نەکرا، دەسەڵاتی کوردی بە “نەزانیی سیاسی” و “چاوچنۆکیی دارایی” خەریکە بۆیان تەواو دەکات.
جێگەی داخی قووڵە کە پارتی و یەکێتی لە ئاستی ناوخۆدا وەک دوو زلهێزی جیهانی مامەڵە لەگەڵ یەکدی دەکەن؛ بە زمانێکی پڕ لە لوتبەرزی و سڕینەوەی یەکتر دەدوێن و ئامادە نین بستێک لە بەرژەوەندییە حزبییەکانیان بۆ بەرژەوەندی گشتی پاشەکشە بکەن. بەڵام کاتێک دەگاتە سەر مامەڵە لەگەڵ نەیاران و وڵاتانی دراوسێ، هەمان ئەو “شێرە ناوخۆییانە” دەبنە کارەکتەری دەستەمۆ و سەرشۆڕ، کە ئامادەن خاک و شکۆی نەتەوەیی بکەنە قوربانی مانەوەی کورسییەکانیان.
ئەم دەسەڵاتە غەدرێکی مێژوویی لە چەمکی “ئازادی” کردووە. لە ناوخۆدا دەنگی ئازاد کپ دەکەن، ڕۆژنامەنووس زیندانی دەکەن و هەر ناڕەزایەتییەک بە خیانەت دەشوبهێنن، کەچی لەولاوە بە ڕوویەکی گەشەوە لە دەرگای پایتەختەکانی جیهان دەدەن و داوای پاڵپشتی بۆ دیموکراسییەتە کارتۆنییەکەیان دەکەن. چۆن دەکرێت میللەتی خۆت لە سەرەتاییترین ماف بێبەش بکەیت و داوای پاراستنی مافەکانت لە بێگانە بکەیت؟
سەیرترین هاوکێشەی ئابووری لەم هەرێمەدا دەبینرێت:
سەرچاوە سروشتییەکان و نەوت بە شێوازێکی ناڕوون و تەمومژاوی تاڵان دەکرێن و دەچنە گیرفانی چەند خێزان و گروپێکی مافیایی.
مووچەخۆران کراونەتە قوربانی ململانێکان و ژیانیان وێران کراوە.
دوای ئەوەی ژێرخانی ئابوورییان وێران کرد، ئێستا بە چاوێکی پڕ لە نیازەوە دەڕواننە بەغدا و واشنتۆن بۆ ئەوەی بڕە پارەیەک وەک سەدەقە وەربگرن تا تەنها کات بکوژن.
ئەگەر ئەم لوتبەرزییەی حزبەکان و ئەم گەندەڵییە سیستماتیکە بەردەوام بێت، مێژوو بە بەزەیی نابێت. هەرێمی کوردستان تەنها بە ناو دەمێنێتەوە و ناوەڕۆکەکەی دەبێتە پاشکۆیەکی بێ ئیرادە. کاتی ئەوە هاتووە خەڵک و نوخبەی ڕۆشنبیر تێبگەن کە پاراستنی نیشتیمان لە دەستی ئەم دەسەڵاتە، کەمتر نییە لە خەبات دژی داگیرکەران.
About the Author
